នារសៀលថ្ងៃពុធ ទី១៣ ខែសីហា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី១ និងឯកឧត្តម លោកជំទាវ ក្រុមសមាជិកព្រឹទ្ធសភាប្រចាំភូមិភាគទី១ បានអញ្ជើញចុះសួរសុខទុក្ខ ព្រមទាំងឧបត្ថម្ភថវិកានិងសម្ភារៈជូន លោកអនុសេនីយ៍ឯក កុល វន អាយុ ៥៦ឆ្នាំ និងលោកពលបាលឯក ស៊ីន សុវណ្ណ អាយុ ២១ឆ្នាំ ឈរជើងប្រាសាទតាក្របី (ខេត្តឧត្តរមានជ័យ) ដែលបានរងរបួសក្នុងការបំពេញភារកិច្ចដ៏ឧត្តុង្គឧត្តមដើម្បីការពារជាតិមាតុភូមិ និងប្រជាជន។
នៅក្នុងឱកាសនោះ ឯកឧត្តមបណ្ឌិត បានពាំនាំនូវការផ្ដាំផ្ញើការសាកសួរសុខទុក្ខពីសំណាក់ សម្តេចតេជោ ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ជូនដល់វីរយុទ្ធជន ដែលបាននិងកំពុងសម្រាកព្យាបាល ព្រមទាំងបានជូនពរសូមឱ្យឆាប់បានជាសះស្បើយ។
ទន្ទឹមគ្នានោះ ឯកឧត្តមបណ្ឌិត បានថ្លែងអំណរគុណដល់ក្រុមគ្រូទេព្យ នៅមន្ទីរពេទ្យព្រះអង្គឌួង ដែលបានខិតខំប្រឹងប្រែងពិនិត្យ និងព្យាបាលវីរយុទ្ធជនរបស់យើង ប្រកបដោយការយកចិត្តទុកដាក់ខ្ពស់។

ប្រភព៖ ខុទ្ទកាល័យឯកឧត្តមអនុប្រធានទី២ ព្រឹទ្ធសភា
រូបភាព៖ នាយកដ្ឋានព័ត៌មាន